Avsluttar søk i Tjeldsund utan funn

Redningsmannskapa avsluttar søket etter ein mann i 70-åra i Tjeldsund utan funn tysdag kveld. Det opplyser Troms politidistrikt. Det har pågått eit større søk i sjøen ved Tjeldøya i Tjeldsund kommune etter funn av ein tom båt. Søket er no avslutta utan funn, og det vil bli planlagt søk etter ein pårekna omkomen, melder politiet. – Det har vore omfattande søk frå lufta med helikopter og drone, i sjøen med båtar, og det har blitt gjort strandsøk til fots av frivillige og hundar utan å finne mannen, opplyser operasjonsleiar Mari Rasmussen Sagen. – Dei pårørande er veldig takknemlege for dei frivillige som har delteke i søket, legg ho til.